بچوں کے عالمی دن کے موقع پر چائلڈ پروٹیکشن انسٹی ٹیوٹ (CPI)، نیشنل ڈیٹا بیس اینڈ رجسٹریشن اتھارٹی (نادرا) اور مشعل اسکول کے اشتراک سے بری امام اسلام آباد میں 100 سے زائد بچوں کا قانونی اندراج مکمل کر لیا گیا۔ یہ اقدام بچوں کے بنیادی حقوق، خاص طور پر ان کی شناخت کے حق کو فروغ دینے کے لیے کیا گیا۔
سی پی آئی کی ڈائریکٹر جنرل نے تقریب سے خطاب کرتے ہوئے کہا کہ بچوں کا پیدائشی اندراج نہ صرف ایک قانونی تقاضا ہے بلکہ ان کی شناخت، تعلیم، صحت اور تحفظ جیسے بنیادی حقوق کی بنیاد بھی ہے۔ انہوں نے اس مہم کو اجتماعی عزم کی کامیابی قرار دیا۔
نادرا نے اسلام آباد کے دور دراز اور پسماندہ علاقوں میں موبائل رجسٹریشن وین کے ذریعے پیدائشی اندراج کا سلسلہ شروع کیا ہے تاکہ دیہی بچوں کو اس اہم خدمت تک آسان رسائی مل سکے اور انہیں کسی قسم کی لوجسٹک رکاوٹ کا سامنا نہ ہو۔ یہ مہم 10 دسمبر 2024 تک جاری رہے گی اور 16 دن کی ایکٹیوزم مہم کا حصہ ہے، جس کا مقصد پسماندہ کمیونٹیوں کو رجسٹریشن کی خدمات فراہم کرنا اور ان کی شمولیت کو یقینی بنانا ہے۔
تاہم، والدین کو یونین کونسل کی سطح پر کئی مسائل کا سامنا ہے، جنہیں فوری حل کرنے کی ضرورت ہے۔ حکومت اور کمیونٹی شراکت داروں کی یہ مشترکہ کوششیں ان بچوں کے محفوظ اور باعزت مستقبل کی تعمیر کی جانب ایک اہم قدم ہیں۔
