حضرت امام حسین رضی اللہ عنہ اور ان کے جانثار ساتھیوں کی کربلا میں دی گئی عظیم قربانی کو خراج عقیدت پیش کرنے کے لیے ملک بھر میں کل یوم عاشور مذہبی عقیدت و احترام کے ساتھ منایا جائے گا۔ اس سلسلے میں ملک کے تمام شہروں اور قصبوں میں ماتمی جلوس نکالے جائیں گے۔علمائے کرام و ذاکرین حضرت امام حسین رضی اللہ عنہ کی روشن اور واضح تعلیمات اور سانحہ کربلا کے مختلف پہلوؤں پر روشنی ڈالیں گے۔ماتمی جلوسوں کے دوران کسی بھی ناخوشگوار واقعے سے بچنے کے لیے سیکیورٹی کے سخت انتظامات کیے گئے ہیں۔
راولپنڈی پولیس نے 10 محرم الحرام کے لیے سیکیورٹی پلان جاری کر دیا۔پولیس کے مطابق یومِ عاشور کو ضلع بھر میں 6 ہزار سے زائد افسران و اہلکار ڈیوٹی کے فرائض انجام دیں گے، ٹریفک کی روانی کے لیے 900 سے زائد ٹریفک وارڈن تعینات ہوں گے۔ راولپنڈی پولیس کا کہنا ہے کہ 10 محرم الحرام کے مرکزی جلوس کے لیے 3 ہزار کے قریب افسران و اہلکار تعینات ہوں گے، ضلع بھر میں 65 جلوسوں اور 113 مجالس کی فول پروف سیکیورٹی یقینی بنائی جائے گی۔
مرکزی جلوس کے داخلی راستوں پر واک تھرو گیٹس نصب کیے جائیں گے، جلوس کے شرکاء کو مکمل سرچ کے بعد داخل ہونے کی اجازت ہو گی، سیکیورٹی اہلکاروں کے ساتھ رضا کار بھی ڈیوٹی کے فرائض انجام دیں گے۔جلوس کی برآمدگی سے قبل راستوں کی مکمل اسکیننگ اور سوئیپنگ کی جائے گی، جلوس کی سیکیورٹی کے لیے بلند عمارتوں پر ماہر نشانہ باز تعینات ہوں گے، مرکزی جلوس کی طرف آنے والے راستوں کو سیل کیا جائے گا۔راولپنڈی پولیس نے یہ بھی بتایا ہے کہ تمام جلوسوں کی نگرانی بذریعہ کنٹرول روم سی سی ٹی وی کیمروں سے کی جائے گی، محرم الحرام کے ضابطۂ اخلاق اور ایس او پیز پر عمل درآمد یقینی بنایا جائے گا، پولیس کے سینئر افسران 10 محرم الحرام کو فیلڈ میں موجود ہوں گے۔
