اٹلی کے وزیر ثقافت نے دنیا کے 7 جدید تعمیراتی عجائباتِ عالم میں شامل روم کے کولوزیئم کی دیوار پر چابی سے اپنا اور اپنی گرل فرینڈ کا نام لکھنے والے شخص کے خلاف کارروائی کا اعلان کیا ہے۔اٹلی کے وزیر ثقافت Gennaro Sangiuliano نے ایک ٹوئٹ میں لکھا کہ ایک سیاح کی جانب سے دنیا کے مشہور ترین مقامات میں سے ایک کی دیوار پر نام لکھنا ایک سنگین اور ناشائستہ عمل ہے۔
انہوں نے کہا کہ توقع ہے کہ جس نے بھی ایسا کیا ہے، اس کی شناخت کی جائے گی اور قوانین کے مطابق سزا دی جائےگی۔انہوں نے ٹوئٹ میں اس سیاح کی دھندلی تصویر اور ایک ویڈیو بھی شیئر کی جس میں وہ چابی کی مدد سے دیوار پر کچھ لکھتا ہوا نظر آرہا ہے۔
Reputo gravissimo, indegno e segno di grande inciviltà, che un turista sfregi uno dei luoghi più celebri al mondo, il Colosseo, per incidere il nome della sua fidanzata. Spero che chi ha compiuto questo gesto venga individuato e sanzionato secondo le nostre leggi. pic.twitter.com/p8Jss1GWuY
— Gennaro Sangiuliano (@g_sangiuliano) June 26, 2023
اطالوی میڈیا رپورٹس کے مطابق اس شخص نے دیوار پر ‘Ivan+Haley 23’ لکھا تھا۔یہ واقعہ 23 جون کو پیش آیا تھا اور سوشل میڈیا پر اس کی ویڈیوز وائرل ہونے کے بعد پولیس نے اس شخص کی تلاش شروع کر دی ہے۔
اگر اس شخص کو مجرم قرار دیا جاتا ہے تو اسے کم از کم 15 ہزار یورو جرمانے یا 5 سال قید کی سزا سنائی جا سکتی ہے۔
خیال رہے کہ کولوزیئم کی تعمیر کو لگ بھگ 2 ہزار سال کا عرصہ ہوچکا ہے اور یہ عمارت 80 بعد از مسیح میں تعمیر کرائی گئی تھی جسے اکھاڑے کے طور پر استعمال کیا جاتا ہے۔
دنیا بھر سے لاکھوں سیاح اسے دیکھنے کے لیے اٹلی کے دارالحکومت روم آتے ہیں۔
