وزیر خارجہ بلاول بھٹو زرداری کے تین روزہ سرکاری دورے پر بغداد پہنچے کے بعد پاکستان اور عراق نے دوطرفہ تعلقات کو مزید مضبوط بنانے پر اتفاق کیا۔
رپورٹ کے مطابق وزیر خارجہ بلاول بھٹو زرداری اور ان کے عراقی ہم منصب ڈاکٹر فواد حسین کے درمیان ملاقات کے دوران دونوں ممالک میں ’افہام و تفہیم‘ طے پائی۔
ریڈیو پاکستان نے وزیر خارجہ بلاول بھٹو زرداری کے حوالے سے کہا کہ پاکستان عراق کے ساتھ گہرے برادرانہ تعلقات کو برقرار رکھے گا۔
رپورٹ میں مزید کہا گیا کہ ملاقات کے دوران دونوں فریقین نے پاکستان اور عراق کے درمیان سفارتی تعلقات کے مختلف پہلوؤں پر تبادلہ خیال کیا۔
عراقی ہم منصب ڈاکٹر فواد حسین کے ساتھ مشترکہ پریس کانفرنس میں دوطرفہ تعلقات کو مضبوط بنانے کی امید کا اعادہ کرتے ہوئے بلاول بھٹو زرداری نے کہا کہ دونوں ممالک نے کے عشروں پرانے تعلقات ہیں اور ہمیشہ ضرورت کی گھڑی میں ایک دوسرے کا ساتھ دیا ہے۔ دریں اثنا ایسوسی ایٹڈ پریس آف پاکستان نے رپورٹ کیا کہ وزیر خارجہ پاکستانی سفارت خانے کا سنگ بنیاد بھی رکھیں گے۔
قبل ازیں وزیر خارجہ بلاول بھٹو زرداری تین روزہ سرکاری دورے پر عراق پہنچے تھے۔
وزیر خارجہ بلاول بھٹو زرداری کی بغداد آمد پر عراقی نائب وزیر خارجہ محمد حسین بحر العلوم، پاکستان کے عراق میں سفیر احمد امجد علی اور سفارت خانے کے حکام نے ان کا استقبال کیا۔
وزیر خارجہ بلاول بھٹو زرداری عراق کا دورہ عراقی نائب وزیر اعظم اور وزیر خارجہ ڈاکٹر فواد حسین کی دعوت پر کر رہے ہیں۔
دونوں وزرائے خارجہ آج باضابطہ ملاقات کریں گے۔ وزیر خارجہ اپنے دورے کے دوران عراقی سیاسی قیادت سے بھی ملاقات کریں گے۔
وزیر خارجہ نئے پاکستانی سفارت خانے کا سنگ بنیاد رکھنے کے علاوہ زیارات پر بھی جائیں گے۔
وزیر خارجہ بلاول بھٹو زرداری دورے کے دوران عراقی قیادت سے ملاقات میں مشترکہ دلچسپی کے متعدد امور اور دوطرفہ تعاون بڑھانے پر تبادلہ خیال کریں گے۔
وزیر خارجہ کے دورہ عراق کے دوران دونوں ممالک کے درمیان تعلیم کے شعبے، ثقافتی تعاون اور ویزا کی سہولت سے متعلق متعدد معاہدوں پر دستخط متوقع ہیں۔
وزیر خارجہ بلاول بھٹو زرداری اردن کے دورے کے بعد عراق کے نائب وزیراعظم اور وزیر خارجہ ڈاکٹر فواد حسین کی دعوت پر آج 5 جون سے 7 جون تک عراق کا دورہ کررہے ہیں۔
دفتر خارجہ کے مطابق وزیر خارجہ بلاول بھٹو زرداری کا عراق کا یہ پہلا دورہ ہے۔
ریڈیو پاکستان نے بلاول بھٹو زرداری کی آمد اور عراقی حکام کے ساتھ ان کی بات چیت کی جھلکیاں دکھانے والی ویڈیوز بھی شیئر کیں۔
