نیویارک(سی این پی) پاکستان نے ایک بار پھر اس عزم کا اعادہ کیا ہے کہ وہ کسی بھی فرد، کسی بھی مقام اور کسی بھی صورتحال میں کیمیائی ہتھیاروں کے استعمال کی سختی سے مخالفت کرتا ہے۔
یہ بات اقوام متحدہ میں پاکستان کے نائب مستقل مندوب سفیر عثمان جدون نے مشرق وسطیٰ کی صورتحال پر اقوام متحدہ کی سلامتی کونسل کے اجلاس سے خطاب کرتے ہوئے کہی۔
سفیر عثمان جدون نے کہا کہ کیمیائی ہتھیاروں کے انسداد سے متعلق کنونشن (Chemical Weapons Convention) عالمی تخفیفِ اسلحہ کے نظام کا ایک بنیادی ستون ہے۔ انہوں نے اس کنونشن کے عالمگیر نفاذ، مؤثر عمل درآمد اور بلاامتیاز اطلاق کے لیے جاری تمام کوششوں کی پاکستان کی جانب سے مکمل حمایت کا اظہار کیا۔
انہوں نے مزید کہا کہ پاکستان کیمیائی ہتھیاروں کے مکمل خاتمے اور عالمی امن و سلامتی کے فروغ کے لیے بین الاقوامی تعاون کو ناگزیر سمجھتا ہے۔
پاکستانی مندوب نے شامی حکام کی جانب سے کیمیائی ہتھیاروں کی ممانعت کی تنظیم (OPCW) کے ساتھ مکمل تعاون کے عزم کو بھی سراہا اور امید ظاہر کی کہ یہ تعاون بین الاقوامی ذمہ داریوں کی تکمیل میں معاون ثابت ہوگا۔
پاکستان نے اس موقع پر عالمی برادری پر زور دیا کہ وہ کیمیائی ہتھیاروں کے خاتمے اور تخفیفِ اسلحہ کے عالمی اہداف کے حصول کے لیے مشترکہ کوششیں جاری رکھے۔